بعد " الكوبرى "

المهم

ركبنا " مشروع " المحطه

ثم تمثل امامنا " كوبرى "

فوجئنا بالسائق اللطيف :

يا جماعه فيه لجنه بعد الكوبرى

اللى معاه حاجه ينزل او يرميها ،

لقينا حد من ورا بيقول على جنب يا اسطى

و نزل و ف ايده قزازه بيبسى

بس اللى فيها مش بيبسى خالص

فا ربيع سألنى السؤال المحورى

انت معاك حاجه ؟

قلتله ما تقلقش سيبها على الله

المهم

عدينا الكوبرى

فا غالبا هنا بقية الزملاء فى المشروع اكتشفوا ان السائق اللطيف

يتحدث بجديه و ان فعلا فيه لجنه

فا حصلت حركة تغيير كبيره فى المقاعد

كتير نزلوا قبل ما يدخل ع اللجنه و ناس غيرهم ركبوا

بديهى ان كل اللى واقفين فى اللجنه من عساكر و مخبرين

خدوا بالهم من التحركات دى

فا اول ما دخلنا وقوفنا

و كان السائق اللطيف مشغل ام كلثوم " انت عمرى "

- بالمناسبه كانت اغنيه جميله فى حاله اجمل-

اول ما امين الشرطه قرب من شباك السائق اللطيف

قاله بصوت عالى : انتو ف فرح ؟!! ( ملحوظه لأمناء الشرطه : ام كلثوم لا تغنى فى الافراح )

-هات الرخص

-حاضر

-خلّص

- ثوانى يا بيه

اهيه ، اتفضل

- امممم ، اركن على يمينك

، الجالس بجانب السائق اللطيف : هو عايز منك ايه ما هو مشى الناس كلها

السائق اللطيف : هو ديته عشه جنى

احد الركاب بشماته : يا عينى كلنا عدينا و السواق هو اللى اتمسك

ترجل السائق

و ام كلثوم لم تكف عن ذكر احد الصباحات التى بدأت بنوره

و جاء السائق عندما اكدت انه عمرها

هنا سأله الجالس بجانبه

: خد العشه جنى ؟

جاوبه السائق اللطيف و هو يعيد تشغيل المحرك :

خدهم حرق و نار ف جتته مش عارف عايزين مننا ايه ولاد ال - سبه تليق بهروب عشرة جنيهات من سائق مشروع -

بعدها تحركنا بسلام واخذ الحديث يجرى بين على يمينك يا اسطى و محطه يا ريس

حتى سلم السائق امره للأسفلت و حول طريقه واخذ يصيح : ابو قير بحر !!