من 30 يونيو حتى الان علاقتى بالاحداث هى: اشاعه - صوره - صوره وخبر - فيديو ، وممكن تلعب ف الترتيب براحتك ، بعد الفض "اللى هى ف حد ذاتها كلمه عيب" ممكن نضيف عنصر كمان وهو (الدهشه على حبة قرف على بضان على حرقة دم على عدم فهم على قرف تانى) ، وممكن كمان نضيف عنصرسادس .. الكوابيس الكتير الغير مفهومه كينونة كابوسيتها فين! ، يعنى انا مش فاهم ليه الحلم ده بصنفه كابوس ، طب ما عادى ارقام الضحايا والمصابين ف شريط الاخبار ، عادى اشلاء وجثث ودم على كل قناة ، فتى وهرى لمحللين وتجار دين ، ليه لما أشوف ده ف الحلم يبقى كابوس ؟ ..
كمشاهد ليا قدر من الكوابيس اكيد مش بقدر الضحيه مثلاً ، اللى هو بيبقى نوعين ، متوفى "شهيد" او مصاب ، لا ، تلات تصنيفات متوفى "شهيد" او مصاب او مصاب نفسياً (كان جوه الحدث ولم يصب بأذى ظاهر) ، لا لا ، اربع تصنيفات متوفى "شهيد" او مصاب او مصاب نفسياً او مصاب اجتماعياً (كان جوه الحدث ولم يصب بأذى ظاهر ولكن أذى نفسى واجتماعى لقريب له او صديق او معرفه او صاحب قضيه زيه لكن ما يعرفوش مات على ايديه او تأثر بشكل او آخر اجتماعيا لفقدانه) لا لا ، هى بص خمس تصنيفات ، بص ، هم كتير ، اوى ، فكر كده ، كم الكوابيس اللى بيشوفوه نائمين أو ممارسين لخراء الواقع ..
لكل اللى قتل وعذب اياً كان انتمائك ، قبل الفض أوبعده ، خاف م الكوابيس ، عشان ممكن تموتك ، قول يارب
